Ўсмирлар Олимпия ўйинларига навбатдаги лицензия!

Буэнос-Айресда бўлиб ўтадиган III ўсмирлар Олимпия ўйинларига лицензия берувчи мазкур мусобақада юртимиз шарафини Бобур Аҳмадалиев ва Никита Бабенишевлар ҳимоя қилишмоқда.

Баҳсларда иштирок этаётган Никита Бабенишев ўз тенгдошлари орасида иккинчи натижани қайд этди ва Буэнос-Айресда бўлиб ўтадиган ўсмирлар Олимпия ўйинларига йўлланмани қўлга киритди. Бу борада биринчи ўринга хитойлик спортчи лойиқ кўрилган бўлса, Япония вакилига Осиё чемпионатининг бронза медали ва Олимпия ўйинларига учинчи лицензия насиб этди.

«Делегациямиз ҳисобига навбатдаги лицензияни қўшиб қўйганимиздан хурсандмиз. Йигитлар ушбу мусобақага узоқ вақт давомида тайёргарлик кўришди. Мураккаб дастур асосида ишладик ва якунда ўз мақсадимизга эриша олдик», – деди терма жамоамиз бош мураббийи, Пекин-2008 Олимпия ўйинлари бронза медали соҳиби Екатерина Хилько.

Ўзбекистон Миллий олимпия қўмитаси ушбу муваффақият билан спортчи ва унинг мураббийи, шунингдек, Ўзбекистон гимнастика федерациясини табриклайди. Таъкидлаш лозимки, Ўзбекистон гимнастика федерацияси ўсмирлар Олимпия ўйинларига гимнастиканинг барча йўналишлари бўйича лицензияларга эга чиқди. Бунга қадар спорт гимнастикасида 2 та, акробатика ва бадиий гимнастикада биттадан йўлланмалар қўлга киритилганди. Энди улар қаторига трамполиндан хам битта йўлланма қўшилди.

Эслатиб ўтамиз, III ўсмирлар Олимпия ўйинлари шу йилнинг 6-18 октябрь кунлари Аргентина пойтахти Буэнос-Айресда бўлиб ўтади.