Ўзбек боксчиси Тошкентда WBS Silver камари учун жанг қилади

Пойтахтимиздаги "Юнусобод" спорт мажмуасида бўлиб ўтадиган жанг оқшомидан саккизта тўқнашув ўрин олган. Olamsport.com сайтига маълум бўлишича, кечанинг марказий жанги проф рингда мағлубиятсиз одимлаётган боксчимиз Азизбек Абдуғофуров иштирокида бўлади. Ўша куни Азизбек айни пайтда вакант бўлиб турган WBS Silver камари учун россиялик таниқли боксчи Дмитрий Чудиновга қарши жанг ўтказади. Маълумот учун, Абдуғофуров бунгача профессионал фаолияти давомида 10 та жанг ўтказиб, уларнинг барчасида ғалаба қозонган. Тўртта жангда эса у рақибини нокаутга учратган. Чудинов эса 25та жанг ўтказиб, уларнинг 21тасида ғалаба қозонган (13таси нокаут). Иккита жангда мағлубиятга учраган бўлса, иккитасида дуранг қайд этган.
Ундан ташқари ўша куни Қудратилло Абдуқаҳҳоров ҳам рингга чиқади. Ҳозирча унинг рақиби номаълум.