"Ўзбек жанг санъати" ўқув қўлланмаси тақдимоти ўтказилди

16 сентябрь куни Ўзбекистон давлат жисмоний тарбия ва спорт университетида Ўзбекистонда хизмат кўрсатган устоз, Ўзбек жанг Санъати федерацияси раиси, Халқаро тоифадаги спорт устаси, Бутунжаҳон миллий спортлар федерацияси (WОМАУ) вице-президенти Усмонов Пўлат Акрамович муаллифлигидаги "Ўзбек жанг санати" ўқув қўлланмаси тақдимоти ўтказилди. 

Ушбу ўқув қўлланма ўзбек тарихининг афсонавий арбоблари қандай қилиб ушбу жанг санъатининг асосларини қўйганлигини ёритиб беради. Уларга Алп Эр Тўнга, Жалолиддин Мангуберди, Темур Малик, Амир Темур, Бобур Мирзо киради. Бу қаҳрамонлар жанг санъатининг қадриятлари ва техникасини шакллантирган. Натижада жанг санъати нафақат ўзини ҳимоя қилиш усули, балки авлодларни илҳомлантириб, бирлаштириб келаётган чуқур маданий бойликка ҳам айланди.

Маълумот ўрнида: "Ўзбек жанг санъати" миллий спорт тури - ота-боболаримиздан қолган буюк мерос бўлиб, у Темурийлар жанг санъатининг замонавий кўриниши ҳисобланади. Бу янги якка кураш замирида “Темурийлар жанг усули”, “қўл санъати”, “кураш”, “етти тирсак” каби усулларнинг энг сара, мукаммал ҳаракатлари мужассамланган. 2009 йилдан "Ўзбек жанг санъати" миллий спорт турлари қаторига киритилди. 2025-2026-ўқув йилидан бошлаб эса Ўзбекистон давлат жисмоний тарбия ва спорт университетида "Ўзбек жанг санати" бўйича ўқув йўналиши очилди.

Мазкур дарслик ушбу йўналишда таълим олаётган талабаларга "Ўзбек жанг санати" асосларини ўргатишда асосий ўқув қўлланма бўлиши билан ҳам аҳамиятли бўлди.