Ўзбек спортида фанни ривожлантириш йўлида меморандум имзоланди

25 апрель куни Ўзбекистон Миллий олимпия қўмитаси ҳамда Нидерландиянинг “Elsevier” компанияси ўртасида жисмоний тарбия ва спорт йўналишида илм-фанни ривожлантириш, спорт йўналишдаги илмий-педагог ходимлар томонидан Scopus va Science Direct халқаро илмий-техник маълумотлар базасидан кенг фойдаланишда ва бошқа масалаларни ривожлантириш бўйича ўзаро ҳамкорлик меморандуми имзоланди. 

Бундан ташқари, Ўзбекистон Миллий Олимпия қўмитасида “Elsevier” (Нидерландия) компаниясининг Марказий Осиё минтақавий директори Алия Оспанова жисмоний тарбия ва спорт йўналишидаги илмий-педагог кадрлар учун маҳорат дарси ўтказди.

Маҳорат дарсида иштирокчиларга Scopus va Science Direct халқаро илмий-техник маълумотлар базасидан фойдаланиш ва илмий мақолаларни юқори импакт-факторга эга журналларда чоп этишга тайёрлаш масалалари батафсил тушунтириб берилди. Илмий мақолаларни дунёдаги энг йирик илмий-таҳлилий платформа - Scopus маълумотлар базасида нашр этишнинг асосий қоидалари, талаблари ҳақида тушунчалар берилди. 

Шунингдек, Алия Оспанова ўз маърузасида Scopus базасидан кенг фойдаланиш, хусусан профессор-ўқитувчилар илмий мақолалари таҳлили, иқтибослар сонини ҳисоблаш борасидаги маълумотларни келтириб ўтди. Жисмоний тарбия ва спорт соҳасида илм билан шуғулланаётган барча тадқиқотчилар учун Elsevier компанияси томонидан беғараз услубий ёрдам берилиши таъкидланди.

Тадбирда “Elsevier” компаниясининг Ўзбекистон бўйича координатори Дилноза Алланазарова, Ўзбекистон Миллий Олимпия қўмитаси хузуридаги спорт тиббиёти бўйича Республика илмий-амалий маркази, Ўзбекистон Давлат жисмоний тарбия ва спорт университети, Ўзбекистон Республикаси жисмоний тарбия ва спорт вазирлиги ҳузуридаги малака ошириш маркази, Ўзбекистон Миллий университетининг спорт йўналишидаги профессор-ўқитувчилари, илмий изланувчилари ҳҳамда илмий-педагог кадрлари иштирок этдилар.