Ўзбекистон Анталия "Катта Дубулға" турниридаги иштирокини нечанчи ўринда якунлади?

Мукофот жамғармаси 154 000 еврони ташкил этган ушбу нуфузли мусобақада Ўзбекистон терма жамоасининг 19 нафар дзюдочиси ҳам медаллар ҳамда Париж-2024 Олимпиадаси йўлидаги қимматли рейтинг очколари учун баҳс олиб борди. Улардан биргина -73 кг вазндаги дзюдочимиз Шаҳрам Аҳадов терма жамоамизга ягона бўлган бронза медалини тақдим этди. 

Бронза медали учун кечган беллашувларда мағлубиятга учраган Сита Кадамбаева (-52 кг), Давлат Бобонов (-90 кг) ва Шоҳруҳхон Бахтиёров (+100 кг) 5-ўринни банд этишди. Дилшодбек Баратов (-60 кг) эса 7-ўрин билан кифояланди. Қолган дзюдчиларимиз чорак финалга етиб кела олишмади. 

Уч кунлик баҳслари якунига кўра, Ўзбекистон терма жамоаси 1 та бронза медали билан дунёнинг 93 давлати орасида 18-ўринни эгаллади. Биттадан кумуш ва бронза медалини қўлга киритган Тожикистон терма жамоаси қўшимча кўрсаткичларга кўра 13-поғонадан жой олди. 

Кутилганидек, Япония терма жамоаси медаллар жамғариш бўйича катта устунлик билан пешқадамга айланди. Дзюдо ватани вакиллари 5 та олтин, 1 та кумуш, 2 та бронза медалига эгалик қилишди. Афсонавий Тедди Ринер бошчилигидаги Франция 3 та олтин, 1 та кумуш, 2 та бронза медалини қўлга киритди. Ринернинг ўзи ҳам чемпионлик шоҳсупасига кўтарилди. Кучли учликка 1 та олтин ва 2 та бронза медали билан Канада терма жамоаси якун ясаб берди.