Ўзбекистон - БАА. Терма жамоамиз ғалаба билан бошлади

Ушбу мусобақада пляж, яъни соҳил футболи бўйича Ўзбекистон терма жамоаси ҳам иштирок этяпти. Аҳад Юсупов шогирдлари илк учрашувда БАА терма жамоасини пеналтилар сериясига кўра мағлуб этишди.

Ўйиннинг асосий вақтида 3:3 ҳисобидаги жанговор дуранг қайд этилди. Терма жамоамиз таркибида футзал бўйича жаҳон чемпионатидан ташқарида қолган Жамолиддин Шарипов дублга эришди. Яна бир гол Феруз Фахрутдинов ҳисобига ёзилди.

Қўшимча бўлимларда ҳисоб ўзгармади. Пеналтилар сериясида эса соҳил футболи вакилларимиз 2:0 ҳисобида зафар қучишди. Бу сафар ҳам футзалчиларимиз Андрей Шлема ва Фахрутдинов ўзларини кўрсатишди. Футзал терма жамоамиз дарвозабони Акмал Хазратқулов эса иккита суперсейвни амалга оширди.

Энди терма жамоамиз чорак финалда Афғонистон билан муносабатларига ойдинлик киритиб олади. Бу учрашув 29 сентябрь куни бўлиб ўтади. Афғонистонлик соҳил футболчилар Хитой терма жамоасидан устун келишди.

Ўзбекистон БАА 3:3 (0:0, пен бўйича 2:0)

27 сентябрь. Вьетнам, Да Нанг. Осиё ўйинлари

Ўзбекистон: Акмал Хазратқулов, Равшан Элибоев, Феруз Фахрутдинов, Сарвар Шоаҳмедов, Зайниддин Тожиев, Фарҳод Мираҳмедов, Фурқат Азизов, Алишер Ибрагимов, Андрей Шлема, Жамолиддин Шарипов.

Бош мураббий - Аҳад Юсупов.