Ўзбекистон Дюссельдорфда 120 давлат орасида УЧИНЧИ бўлди

Йилнинг ҳисоб бўйича иккинчи "Катта Дубулға" мусобақасида сайёрамизнинг 5 қитъаси 120 давлатидан жами 718 (427 эркак, 291 аёл) дзюдочи, улар қаторида 15 нафар ўзбекистонлик полвонлар ҳам турнир медаллари ҳамда Токио-2020 Олимпиадаси йўлидаги муҳим рейтинг очколари учун татамига чиқишди. 

Уч кунлик беллашувлар якунига кўра кутилганидек Япония терма жамоаси медаллар жамғариш бўйича умумжамоа ҳисобида биринчи ўринни эгаллади. Дзюдо ватани вакиллари 8 та олтин, 1 та кумуш ва 1 та бронза медали билан якка пешқадам бўлишди. Грузия терма жамоаси 2 та олтин, 1 та кумуш ва 1 та бронза медали билан иккинчи ўринни эгаллади. Агар +100 кг вазнда Гурам Тушишвили олтин медални қўлга киритмаганида, умумжамоа ҳисобидаги иккинчи ўрин Ўзбекистонга насиб этарди.

Давлат Бобонов (-90 кг) ва Муҳаммадкарим Ҳуррамов (-100 кг) томонидан қўлга киритилган 2 олтин медаль Ўзбекистон терма жамоасига кучли учликдан жой олиш имконини берди. Бир нафардан чемпионга эга Франция ва Канада терма жамоалари бешликни якунлаб беришди. Айнан мана шу 5 давлат спортчиларига мусобақанинг олтин медаллари насиб этди. 

Ўн тўртта давлат терма жамоалари камида биттадан кумуш, 22 мамлакат дзюдочилари эса камида битта бронза медалига эга бўлган. Қолган 98 давлат делегациялари ортга медалсиз қайтишган.