Ўзбекистон ўқ отиш федерацияси раҳбариятида ўзгариш

Унда МОҚ раиси Рустам Шоабдураҳмонов, Ўзбекистон ўқ отиш федерацияси раиси Ойбек Норинбоев, Ўзбекистон Республикаси Мудофаасига кўмаклашувчи “Ватанпарвар” ташкилоти мутасаддилари, вилоят бўлими вакиллари ва ОАВ иштирок этишди.

Конференциянинг кун тартибидан федерациянинг 2021 йилдаги фаолиятига бағишланган ҳисоботни кўриб чиқиш, вилоят бўлимлари ишини кучайтириш ва федерация раиси ўринбосарлигига янги вакил сайлаш масалалари ўрин олди.

Тадбирни олиб борган федерация бош котиби Мардон Давронов биринчи ва иккинчи масалалар, жумладан, Токио-2020 циклида қилинган ишлар, Ханчжоу-2022 Осиё ва Париж-2024 Олимпия ўйинларига тайёргарлик, бунда вилоят бўлимлари билан ишлашни кучайтириш тўғрисида тўхталиб ўтди.

Шундан сўнг, кун тартибининг асосий масаласига навбат берилди. Унга кўра, Ўзбекистон Республикаси Мудофаа вазирининг ўринбосари Ҳамдам Қаршиев номзоди федерация раиси ўринбосари лавозимига кўрсатилди. Иштирокчилар номзодни бир овоздан маъқуллашди ва Ҳамдам Алиқулович Ўзбекистон ўқ отиш федерацияси раиси ўринбосари этиб сайланди.

Ўз ўрнида, Ҳамдам Қаршиев сўз олиб, билдирилган ишончни оқлаш, спортимиз ривожига ҳисса қўшиш учун бор имкониятини ишга солишини айтиб ўтди. 

Шу тариқа, Ўзбекистон ўқ отиш федерацияси раҳбарияти таркиби қуйидаги кўринишга келди:

Федерация раиси: Норинбоев Ойбек Қобилжонович

Федерация раисининг биринчи ўринбосари: Қодиров Дониёр Бахтиёрович

Федерация раисининг ўринбосарлари: Қаршиев Ҳамдам Алиқулович ва Еналиев Рамиз Равильевич

Шундан сўнг, Рустам Шоабдураҳмонов ва Ойбек Норинбоев сўз олиб, Президентимиз Шавкат Мирзиёев бошчилигида давлатимизнинг спортни ривожлантиришга қаратаётган эътибори ва қўллаб-қувватлаши, олдинга қўйилган режалар хусусида тўхталиб, Ҳамдам Қаршиевга янги лавозимида омад ва зафарлар тилаб ўтишди.

Шу тариқа, Ўзбекистон ўқ отиш федерациясининг навбатдан ташқари ҳисобот-сайлов конференцияси ўз ишини якунлади.