ЎзДЖТСУда талабалар учун дзюдо бўйича ўқув семинари ташкил этилди

Мазкур маҳорат дарсларида дзюдо бўйича халқаро тоифадаги спорт устаси, Ўзбекистонда хизмат кўрсатган мураббий, II даражали “Соғлом авлод учун” ордени соҳиби, Ўзбекистонда дзюдо спорт турининг асосчиси, профессор Арслон Элов, Ўзбекистонда хизмат кўрсатган мураббий, халқаро кураш турлари назарияси ва услубияти кафедраси мудири Шуҳрат Арслонов, дзюдода ном қозонган ва ҳозирда кафедрада талабаларга дзюдо бўйича устозлик қилаётган Малик Анорбоев, Абдулла Тангриев, Бахит Жуманов, Фарҳод Тўраев, Зафар Бўриев, Акмал Урмонов, Виктория Оздаева, Сирожиддин Қодировлар дастлаб талабаларга харқаро дзюдо федерацияси томонидан дзюдо спорт тури қоидаларига киритилган ўзгаришлар борасида батафсил таништириб ўтишди. 

Шундан сўнг кафедранинг профессор-ўқитувчилари ҳамда дзюдо йўналишида таҳсил олаётган талаблар иштирокида янги қоидаларнинг бажарилиш усулларини маҳорат дарси орқали кўрсатиб беришди.

Арслон ЭЛОВ, Халқаро кураш турлари назарияси ва услубияти кафедраси профессори: 

- Маълумки, 1972 йилда Япониядан бир гуруҳ дзюдо мураббийлари Тошкентга шаҳрига ташриф буюриб, дзюдо спорт турини мамлакатимизда кенг ривожлантириш бўйича семинар ўтказиб кетишган эди. Ўшанда ушбу спорт турини кенг оммалаштириш ва ривожлантириш айнан мени зиммамга юклатилган ва мен 1972 йилдан мамлакатимиз бўйлаб кезиб, бу вазифани бажаришга киришганман. 75 ёшни қаршилаяпманки, ҳали-ҳамон кафедрада талабаларга дзюдо сирларини ўргатиб келаман. Бугунги ўқув-амалий семинаримиз талабаларимизни халқаро дзюдо федерацияси томонидан ҳар тўрт йилда киритиладиган янги қоидалари билан таништиришдан иборат бўлди. Шунингдек, дзюдо йўналишида таҳсил олаётган талабалар эртага олийгоҳни тугатиб, жойларда мураббийлик фаолиятини бошлаганда шогирдларига ушбу янги қоидалар асосида ҳам ўргатиб бориши, қолаверса, талабаларимизнинг мамлакат ва халқаро миқёсдаги мусобақаларда киритилган янги қоидаларни пухта ўзлаштирган ҳолда иштирок этиши ҳам мақсад қилинган.

Илҳом РАҲМОНОВ тайёрлади, ўз мухбиримиз