Пакьяо бугунги ғалабаси учун қанча гонорар олади?

Филиппинлик 37 ёшли афсона ўзидан роппа-роса 10 ёшга кичик бўлган рақиби, ярим ўрта вазн тоифасида WBO йўналиши чемпиони америкалик Жесси Варгасни 118-109, 118-109, 114-113 ҳисобида мағлубиятга учратди.

Жангдан олинадиган умумий даромад тахминан 19,5 миллион доллар бўлади. Бугунги мағлубияти учун Варгас 2,8 миллион доллар гонорар олади. Бу сумма қўшимча тўловлар эвазига бироз кўпроқ ҳам бўлиши мумкин.

Мэнни Пакьяонинг улуши эса тахминан 6,5 миллион доллар бўлиши айтилмоқда. Бу эса филиппинлик боксчининг аввалги жангларига нисбатан анча кам гонорар сифатида қайд этилади.  

Пакьяо сўнгги 14та жанги учун 15 миллион доллардан кам ҳақ олмаган. “Аср жанги” номини олган Флойд Мейвезерга қарши кечган жангдан у 150 миллион доллар гонорар ишлаб олган эди.

Ҳозирча унинг энг кам олган гонорари 2008 йилнинг июнь ойига тўғри келади. Ўшанда Пакьяо Дэвид Диасни нокаутга учратган бўлиб, якунда 3 миллион доллар гонорарга эга бўлганди.