Париж "Катта Дубулға". Тўраев учинчи босқичда, Диёра, Диёрбек, Сардор ва Ғиёсжонда мағлубият

Хабар берганимиздек, Paris Grand Slam 2020 мусобақасининг илк куни 6 нафар дзюдочимиз турнир медаллари ҳамда Токио-2020 Олимпиадаси йўлидаги қимматли рейтинг очколари учун татамига чиқиши керак эди.

Улардан уч нафари рақибларига имкониятни бой бериб, мусобақадаги иштирокларини якунлашди. -52 кг вазн тоифасидаги вакиламиз Диёра Келдиёрова илк даврада мадагаскарлик Тессиа Циоринринани мағлуб этди. Аммо, иккинчи босқичда италиялик таниқли рақиби Одетте Гюффридага ютқазиб қўйди. Келдиёрова Париждаги иштироки учун 120 рейтинг очкосига эга бўлди.  

-66 кг вазнли дзюдочимиз Сардор Нуриллаев иккинчи босқич учрашувида испаниялик Мартин Гайтерога қўшимча бўлимда имкониятни бой берди. Ушбу вазнда дебют қилган Диёрбек Ўразбоев ҳам мағлубият аламини тотиб кўрди. Рио-2016 Олимпиадаси бронза медали совриндори росиялик Мурад Чопановдан енгилди. 

-73 кг вазнда юртимиз шарафини ҳимоя қилаётган Ҳикматуллоҳ Тўраев ўзининг илк беллашувида ботсваналик Тирело Лекокодан устун келди. Бу вазндаги иккинчи вакилимиз Ғиёсжон Бобоев эса мўғулистонлик Одбайар Ганбаатардан мағлуб бўлди. 

Бироздан сўнг Кемран Нуриллаев (-60 кг) иккинчи босқич учрашувида 18-Осиё ўйинлари совриндори, кореялик Ли Харимга қарши татамига чиқади.