Пойтахтимиз яна бир нуфузли мусобақага мезбонлик қилади

Шу кунлари муҳташам “Ўзбекистон” спорт мажмуасида дзюдо бўйича Гран-При мусобақаси бўлиб ўтади. Мана бир неча йилдирки, юртимиз айнан куз ойларида ушбу Гран-При турнирига мезбонлик қилиб келяпти. Соврин жамғармаси 100 000 долларни ташкил этувчи мусобақада дунёнинг 30дан зиёд давлатидан сара полвонларнинг иштирок этиши кутилмоқда.

Терма жамоамиз аъзолари ҳам тўлиқ таркибда Тошкент Гран-Присида ўз имкониятларини синовдан ўтказишади. Мусобақа регламентига кўра мезбон давлат ҳар бир вазн тоифасида тўрт нафар спортчи билан қатнашиши мумкин.

Мусобақада юртимиз спорт шарафини Шарофиддин Лутфуллаев, Яҳё Имомов, Шаҳзод Собиров, Ғиёсжон Бобоев, Диёрбек Ўрозбоев, Шерали Жўраев каби кўзга кўринган спортчиларимиз ҳимоя қилишади. Эртага, 5 октябрь куни Тошкент Гран-Присига қуръа ташлаш маросими ҳамда матбуот анжумани ўтказилади. 6-8 октябрь кунлари эса белгиланган вазн тоифаларида ғолиб ва совриндорлар аниқланади.