Prague Masters. Нодирбеклар 4-турда қандай натижа қайд этишди? Бугун Абдусатторов - Гукеш "жанги" бўлади

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ва Нодирбек Якуббоев ҳам бош соврин йўлида одимламоқда.

Кеча ўтказилган тўртинчи турда гроссмейстерларимиз битта дуранг ва мағлубият қайд этишди. Абдусатторов қора доналарда испаниялик Дэвид Антон билан муросага келди. Якуббоев эса оқ доналарда ўйнаб, рейтингда ўзидан юқорида бораётган нидерландиялик Йорден ван Форестга имкониятни бой бериб қўйди. 

Якуббоевнинг бу мағлубияти Абдусатторовни пешқадамликдан туширди. Очколарини учтага етказиб олган ван Форест соф биринчи ўринга кўтарилиб олди. Нодирбек Абдусатторов 2,5 очко билан қўшимча кўрсаткичларга кўра иккинчи ўринни эгаллаб турибди. Чехиялик Давид Навара ҳисобида ҳам 2,5 очко бор. Якуббоев 2 очко билан бешинчи поғонада бормоқда.   

Prague Masters 4-турида амалдаги жаҳон чемпиони ҳиндистонлик Гукеш Доммараджу оқ доналарда Давид Навара билан дурангга имзо чекди. Ҳиндистонлик Аравиндҳ Читамбарам германиялик Винсент Кеймерга ютқазиб қўйди. Эронлик Парҳам Мақсудлу АҚШ вакили Ҳанс Мокс Ниеманн билан дурангга рози бўлди.

Бугун ўтказиладиган бешинчи турда Нодирбек Абдусатторов оқ доналарда жаҳон чемпиони Гукеш Доммараджу билан ҳисоб-китоб қилади. Нодирбек Якуббоев эса қора доналарда Давид Навара синовидан ўтади.