Пратес UFC билан янги шартнома имзолади, биринчи жанг – Махачевга қарши!

Янги келишувга қўшимча равишда, бразилиялик аралаш яккакураш устаси дивизионнинг амалдаги чемпиони Ислам Махачевга қарши навбатдаги чемпионлик жангида иштирок этиш кафолатини олди.

Бу ҳақда "Даҳшат" (The Nightmare) лақабли жангчи спорт шарҳловчиси Ариэль Хельвани билан бўлган интервюсида маълум қилди.

"Мен чемпионлик учун навбатдаги даъвогарман, энг муҳими шу! Мен саккизта жанг учун янги шартнома имзоладим ва уларнинг биринчиси чемпионлик жанги бўлади", – деди бразилиялик спортчи.

Чемпионликка яна бир даъвогар Майкл Моралеснинг истиқболлари ҳақидаги саволга Пратес, мағлубият нималигини билмайдиган эквадорлик яна битта жанг ўтказиши керак, деб жавоб берди.

"Моралес яна битта жанг ўтказиши керак, балки Белал Муҳаммад ёки кучли бешликдаги бошқа бирор рақиб билан. Унга яна бир ғалаба керак", – дея қўшимча қилди Пратес.

Ўтган дам олиш куни Карлос Пратес Ислам Махачев ва Йен Мачадо Гэрри ўртасидаги чемпионлик жангини шахсан октагонда четида кузатиб борганди.