Қаршида дзюдо бўйича халқаро турнир старт олди

Вилоят жисмоний тарбия ва спорт бошқармаси, Ўзбекистон дзюдо федерацияси ҳамкорлигида ташкил этилаётган мазкур анъанавий халқаро турнирда Қорақалпоғистон Республикаси, Тошкент шаҳри ва барча вилоятлар, шунингдек, Қозоғистон, Тожикистон, Россия давлатларидан саккиз юз нафарга яқин ёш дзюдочилар 18 та вазн тоифасида ғолиблик учун татамига чиқишяпти.

Мусобақанинг биринчи куни жамоавий беллашувлар ҳам ўтказилган. Унда Бухоро вилояти жамоаси биринчи, мезбонлар иккинчи, Тошкент шаҳри ва Самарқанд вилояти жамоалари учинчи ўринни банд этишган.

Халқаро турнир 29 ноябрга қадар давом этади. Мусобақа ғолиб ва совриндорлари вилоят жисмоний тарбия ва спорт бошқармаси ҳамда вилоят дзюдо федерацияси томонидан диплом, медаль ва эсдалик совғалари билан тақдирланишади. 

Нурбек САЙНАБИЕВ, Қашқадарё вилоят жисмоний тарбия ва спорт бошқармаси мутахассиси

Илҳом РАҲМОНОВ, ўз мухбиримиз