Қаршидаги турнирнинг илк даврасида 5 теннисчимиз мағлуб бўлди

Соврин жамғармаси 25 000 АҚШ долларини ташкил қилувчи мазкур мусобақанинг асосий тўр баҳсларида 9 нафар теннисчимиз иштирок этиши маълум бўлганди.

Афсуски, кечаги илк кунги баҳсларда 5 нафар теннисчимиз мағлубият аламини тотиб кўрди. Албина Хабибулина россиялик Екатерина Яшинага 3:6, 6:4, 5:7, Арина Фольц яна бир рус теннисчиси Анастасия Фроловага 0:6, 1:6 ҳисобида ютқазиб қўйди.

Шунингдек, Ясмина Каримжонова британиялик Кристина Фреяга, Камола Умарова россиялик Олеся Первушинага, Милана Масленкова қирғизистонлик Ксения Палкинага имкониятни бой берди.

Бугун ҳамюртларимиздан Сарвиноз Саидхўжаева, Полина Меренкова, Лайло Баҳодирова ҳамда турнирнинг биринчи ракеткаси Нигина Абдураимова биринчи давра учрашувида кортга чиқади.

Қуръа натижасига кўра, Нигина Абдураимова асосий тўрнинг илк даврасида руминиялик Микаэла Бузарнеску билан муносабатларига ойдинлик киритиб олади.

Ҳамюртларимизнинг 1-даврадаги рақибалари:

Нигина Абдураимова – МикаэлаБузарнеску (Руминия)

Полина Меренкова – Гўзал Айнитдинова (Қозоғистон)

Лайло Баҳодирова – Валерия Савиних (Россия)

Сарвиноз Саидхўжаева – Валерия Страхова (Украина, 7)