17 май 08:14
Янгиликлар

Бокс/ММА

Расман! Конор Макгрегор беш йиллик танаффусдан сўнг қайтмоқда + ПОСТЕР

Ҳа, бу ҳазил эмас, икки вазн тоифасида UFC собиқ чемпиони Конор Макгрегорнинг жанги расман эълон қилинди.

11 июль куни АҚШнинг Лас-Вегас шаҳрида ташкил этиладиган UFC 329 турнирининг асосий жангида ирландиялик Конор Макгрегор америкалик Макс Холлоуэйга қарши реванш мақомидаги баҳсда октагонга чиқади. Лига ушбу жангни расман тасдиқлади. Жанг ярим ўрта вазн тоифасида ўтказилади.

Бу икки аралаш яккакураш устасининг илк жанги 2013 йилнинг август ойида ўтказилган бўлиб, ўшанда Конорнинг ғалабаси билан якунланган эди. Макгрегор ўшанда ҳакамларнинг якдил қарори билан зафар қучганди.

Шундан сўнг ирландиялик енгил ва ярим енгил вазн тоифасида UFC чемпионлик камарларини қўлга киритиб, ташкилотнинг биринчи икки карра чемпионига айланди, америкалик эса ярим енгил вазн тоифасида чемпион, шунингдек, BMF камари соҳиби бўлди.

Конор Макгрегор беш йил аввал Дастин Порьега қарши жангда оёғидан оғир жароҳат олганидан бери октагонга чиқмаган, Макс Холлоуэй эса жорий йилнинг март ойида ҳакамларнинг якдил қарори билан Чарльз Оливейрага ютқазиб, BMF камарини бой берганди.