Рио-2016. Енгил атлетика баҳсларида АҚШдан 127 нафар спортчи қатнашади

Бразилияга йўл оладиган таркибдан 127 нафар енгил атлетикачи ўрин эгаллаган бўлиб, улардан беш нафари амалдаги Олимпия чемпионлари, яна беш нафар эса жаҳон чемпионлари ҳисобланади. Бундан ташқари 46 нафар спортчи турли даражадаги нуфузли халқаро турнирларда совринли ўринларни эгаллаган бўлсалар, 84 нафар спортчи биринчи марта Олимпия ўйинларида қатнашади. 

Бўлажак Олимпия ўйинларининг ўнкураш баҳсида Эштон Итон, узунликка сакраш секторида Бриттни Риз, лангарчўпга таяниб сакрашда Женнифер Сур, уч хатлаб сакраш мусобақасида Кристиан Тейлор ва югуриш баҳсларида Эллисон Феликс чемпионлик унвонларини ҳимоя қиладилар. 

АҚШ енгил атлетикачилари орасида энг ёши катта спортчи Бернарт Лагат ҳисобланади. “Рио-2016” ўйинлари 41 ёшли спортчи учун фаолиятидаги бешинчи Олимпиада бўлиб, у 5 км. масофага югуриш баҳсларида совринли ўринлар учун кураш олиб боради. Ўз навбатида, 400 метр масофага тўсиқлар оша югуриш секторида қатнашадиган Сидней Маклафлин америкалик енгил атлетикачилар орасида энг ёши ҳисобланади. Маклафлин 7 август куни 17 ёшга тўлади.

Эслатиб ўтамиз, 2012 йили Лондон (Буюк Британия)да бўлиб ўтган ХХХ ёзги Олимпия ўйинларида америкалик енгил атлетикачилар 9 та олтин, 12 та кумуш ва 7 та бронза медалига сазовор бўлишган.

Маълумот учун, Рио-де-Жанейро шаҳрида ўтказиладиган XXXI ёзги Олимпия ўйинларида енгил атлетика бўйича мусобақалар 12-21 август кунлари ўтказилади.