Рио-де-Жанейродаги Олимпия қишлоғига мэр тайинланди

Халқаро олимпия куни муносабати билан уюштирилган мазкур тадбир бевосита Олимпия қишлоғида ташкил этилган. Тадбирда иштирок этган ОАВ ходимлари Олимпия қишлоғига ташриф буюрган дастлабки меҳмонлардан бўлдилар. Бунга қадар Олимпия қишлоғига кириш учун ташкилотчилар ва қурилиш вакилларигагина рухсат берилган.

Рио-де-Жанейро шаҳрининг ғарбий қисмида жойлашган Олимпия қишлоғига спортчиларни 24 июлдан жойлашиши кутилмоқда. Жанет дус Сантус Аркауин Олимпия қишлоғининг мэри сифатида ўйинлар иштирокчилари ҳамда фахрий меҳмонларни кутиб олади. 

“Бирор бир муаммо туғилганда делегация аъзолари масъул ходимларга мурожаат қилишлари мумкин бўлади. Агарда масъуллар билан муаммо ўз ечимини топмаса, у ҳолда мен ишга киришаман. Бир сўз билан айтганда, Олимпиада иштирокчилари ҳамда маҳаллий ва хорижий хукумат вакилларига яқиндан кўмак бериш менинг асосий вазифамга киради. Мен барчаси яхши ўтиши ва ҳаммага манзур бўлиши учун астойдил ҳаракат қиламан”, - деди собиқ баскетболчи.

Жанет дус Сантус Аркауин, шунингдек, Олимпия қишлоғи раҳбарияти меҳмонларнинг осойишталиги ҳамда ҳавфсизлиги, жумладан, Зика вирусининг хавфсизлиги йўлида талаб этиладиган барча саъй-ҳаракатларни ишга солишини таъкидлади.

Шавкат Жалилов тайёрлади