26 май 18:36
Янгиликлар

Теннис

Ролан Гаррос. Денис Истомин иккинчи ғалабасига эришди

Франция пойтахти Париж шаҳрида "Катта Дубулға" туркумига кирувчи "Ролан Гаррос" турнирининг саралаш баҳслари давом этмоқда.

Саралашда иштирок этаётган мамлакатимизнинг биринчи ракеткаси Денис Истомин илк босқич учрашувида жаҳон рейтингида 125-ўринни эгаллаб турган Босния ва Герцоговина вакили Дамир Жумхурни 2/6, 6/2, 6/1 ҳисобларида мағлубиятга учратган эди.

Бироз аввал юртдошимиз саралашнинг иккинчи давра учрашувини ўтказди. Бу сафар Истомин рейтингнинг 215-поғонасидан жой олиб турган ҳиндистонлик Рамкумар Раманатанни 1 соату 5 дақиқа давом этган баҳсда 6/1, 6/2 ҳисобларида таслим этди.

Дениснинг учинчи босқичдаги рақиби бироздан сўнг бошланадиган Томас Барриос (Чили) - Тобиас Камке (Германия) учрашувидан сўнг маълум бўлади. Барриос ATP рейтингида 230, Камке эса 239-поғонани банд этган.