"Ролан Гаррос" турнирининг яна бир 1/2 финалчиси маълум

Эркаклар ўртасидаги баҳсларда дунёнинг учинчи ракеткаси, германиялик Александр Зверев рейтингда ўзидан уч поғона қуйида бораётган испаниялик Карлос Алькаразни 6/4, 6/4, 4/6, 7/6(7) ҳисобида мағлуб этиб, Франция Очиқ чемпионатининг ярим финал иштирокчисига айланди.

Уч соату 21 дақиқа давом этган баҳсда 25 ёшли Зверев 7 та эйс, 6 та қўшхато, 3 та брейк қайд этди. 19 ёшли испаниялик эса 2 та эйс, 2 та брейкни амалга ошириб, 3 та қўшхатога йўл қўйди. Теннисчиларнинг ўзаро учрашувларида Карлос ортда боряпти - 1:3.

Зверев "Катта Дубулға" турнирларидаги 12-уринишида ТОП-10 теннисчисини мағлуб этишга муваффақ бўлди. У қаторасига иккинчи йил "Ролан Гаррос" ярим финалида ўйнайди. Зверевнинг финал остонасидаги рақиби эса испаниялик Рафаэль Надаль бўлади.