"Ролан Гаррос"нинг амалдаги чемпиони турнирни илк даврадаёқ тарк этди

Сайёрамизнинг иккинчи ракеткаси Барбора Крейчикова турнирнинг биринчи даврасида WTA рейтингида 97-ўринни эгаллаб турган мезбонлар вакиласи Диана Паррига қарши кортга чиқди. 

Икки соату 10 дақиқа давом этган учрашувда турнирнинг амалдаги чемпиони Барбора Крейчикова рақибасига 6/1, 2/6, 3/6 ҳисобида имкониятни бой бериб қўйди ва мусобақани тарк этди.  

Шу тариқа, чехиялик теннисчи биринчи даврада чемпионликни ҳимоя қилолмай турнирни тарк этган учинчи "Ролан Гаррос" чемпионига айланди. Ундан аввал Анастасия Мискина (2005) ва Елена Остапенко (2018) ҳам шундай натижани кўрсатишган эди.

Маълумот учун, бу йил чехиялик спортчи жароҳат туфайли барча грунт турнирларни ўтказиб юборди. Энди Крейчикова биринчи босқичдаги мағлубият туфайли кучли ўнталикдан чиқиб кетади ва камида 12-ўринга жойлашади.