Рюдигер "Реал" машғулотида Каррерасга қўл кўтарди

Шу ҳафта Onda Cero журналисти Мигель Серрано Рюдигер Каррераснинг юзига ургани ҳақида хабар берди. Унинг сўзларига кўра, воқеа апрель ойида мадридликларнинг "Алавес" ва "Бетис"га қарши ўйинлари оралиғида содир бўлган.

The Athletic нашри ҳам апрель ойида германиялик ҳимоячининг жамоадошларидан бири билан можароси келиб чиққанини тасдиқлаганди. Ўшанда Антонио узр сўрагани ва бутун жамоани оиласи билан бирга тушликка таклиф қилгани айтилган эди.

COPE журналисти Мигель Анхель Диас эса Рюдигер Каррераснинг юзига урганини тасдиқлади, бироқ бу воқеа апрелда эмас, балки февралда — бутун жамоа йиғилган кечки овқатнинг эртасига содир бўлганини таъкидлади.

Испаниялик футболчи тарқалган гап-сўзларга муносабат билдирди.

"Сўнгги кунларда мен ҳақимда ҳақиқатга тўғри келмайдиган турли иғво ва шарҳлар пайдо бўлди. Менинг ушбу клубга ва мен билан бирга ишлаган мураббийларга бўлган садоқатим биринчи кундан бошлаб мустаҳкам бўлган ва шундай бўлиб қолади.

Қайтган пайтимдан бери доимо юқори профессионаллик, ҳурмат ва фидойилик билан ишлаб келмоқдаман. Уйга қайтиш орзуимни амалга ошириш учун жуда кўп меҳнат қилдим.

Жамоадошим билан боғлиқ ҳодисага тўхталадиган бўлсам, бу бир марталик ва аҳамиятсиз ҳолат бўлиб, у аллақачон ҳал қилинган. Менинг бутун жамоа билан муносабатларим жуда яхши", – деб ёзди Каррерас инстаграмдаги сторисида.