Самбо бўйича жаҳон чемпионатининг тантанали очилиш маросими бўлиб ўтди

46-маротаба ташкил этилаётган мазкур жаҳон чемпионатида жаҳоннинг 50 га яқин мамлакатидан 400 нафарга яқин самбочи медаллар учун баҳсларга киришди.

Уч кун давом этадиган чемпионатда эркаклар, аёллар ҳамда жанговар самбо йўналишида 7 тадан вазнда, умумий ҳисобда 21 та медаллар жамланмаси ўйналади.

Бугун "Юнусобод" спорт мажмуасида жаҳон чемпионатининг тантанали маросими ташкил этилди. Унда Туризм ва спорт вазири Азиз Абдуҳакимов, Ўзбекистон Миллий олимпия қўмитаси раиси Рустам Шоабдураҳмонов, МОҚ бош котиби Ойбек Касимов Халқаро самбо федерацияси президенти Василий Шестаков, Осиё самбо уюшмаси президенти Аламжон Муллаев, Ўзбекистон самбо ассоциацияси раиси Алишер Алимов ва бошқалар иштирок этишди.

Тадбир давомида Василий Шестаков сўзга чиқиб, мезбонлик учун Ўзбекистонга миннатдорчилик билдирди. Азиз Абдуҳакимов эса юртимизда спортга, ҳусусан самбога қаратилаётган эътибор, ўзбек самбочилари Осиё ва жаҳон миқёсида ўз ўрнига эга эканлиги ҳақида гапириб ўтди.

Давлат мадҳиясидан сўнг тадбирнинг бадиий қисми бўлиб ўтди. Эстрада хонандаларининг чиқишлари мухлисларга ҳуш кайфият бағишлади.

Шундан сўнг финал беллашувлари бошланди.