Санжар Файзиев: “Ҳеч қачон “пост” қолдирмагандим, лекин бу сафар мажбур бўлдим”

Кеча ҳал қилувчи учрашувда Санжар Файзиев Буюк Британия терма жамоасининг биринчи ракеткасига 2:6, 2:6, 0:6 ҳисобида ютқазиб қўйганди. Аслида бу баҳсда Камеронга қарши Денис Истомин кортга чиқиши керак эди. 

Лекин бизга маълум бўлмаган сабабларга кўра, Дениснинг ўрнини Санжар эгаллади. Файзиевга эътирозимиз йўқ. Қўлидан келганича ҳаракат қилди. Аммо, тажриба бу сафар ўз сўзини айтди. Жўрабек Каримов эса айнан ёшлик шижоати эвазига сенсацион натижа қайд этганди. Кечаги учрашувдан сўнг Файзиев facebook ижтимоий тармоғидаги саҳифасида фикр қолдирган.

“Шу кунгача ижтимоий тармоқларда муносабатга асосланган фикр қолдирмагандим. Лекин бу сафар “пост” ёзишга мажбур бўлдим. Спортга, хусусан теннисга алоқадор барча инсонлардан, терма жамоамизга бефарқ бўлмаган мухлислардан КЕЧИРИМ сўрайман. 

Афсуски, кутилган ўйинни намойиш эта олмадим. Тўғри, теннис бу шунчаки бир ўйин, лекин мамлакат терма жамоаси ўйнаганида, бунинг масъулияти умуман бошқача бўлади. Ўз ўйиним ва қайд этган натижам билан қанча инсонларнинг кайфиятини тушириб юбордим. Буни жуда яхши биламан.

Кейинги ўйинларда вазиятни ижобий томонга ўзгартиришга ҳаракат қиламан. Айнан менинг иштирокимдаги охирги ўйинни инобатга олмаганда, жамоамиз ғалаба учун борини берди. Дўстим Жўрабек Каримовни алоҳида таъкидлаб ўтган бўлардим. Ҳаёт давом этади, келаси йили жаҳон лигасига чиқишга уриниб кўрамиз”, - деди Файзиев.