Саралашда ютқазган Саидаъло асосий тўрнинг чорак финалида!

Мусобақанинг саралаш баҳсларида ҳамюртимиз Саидаъло Саидкаримов ҳам иштирок этганди. Лекин саралашнинг еттинчи ракеткаси бўлган вакилимиз асосий тўрга йўлланма берувчи учрашувда тўққизинчи ракетка россиялик Дмитрий Мнушкинга 7:6(4), 6:7(3), 3:6 ҳисобида имкониятни бой берган эди.

Шунга қарамай, турнир ташкилотчилари теннисчимизга асосий тўрда қатнашиш ҳуқуқини берувчи имтиёзли йўлланма тақдим этишганди. Саидъало эса бу ишончни оқлади ва кетма-кет иккита учрашувда ғалаба қозониб, чорак финалга йўл олди.

У илк даврада гватемалалик Вильфредо Гонсалесни 6:4, 6:4 ҳисобида мағлуб этди. Ҳозиргина якунига етган иккинчи давра баҳсида эса россиялик Денис Клокдан устун келди. Биринчи сет 6:4 ҳисобида ҳамюртимиз фойдасига ҳал бўлди. Иккинчи сетнинг учинчи геймидан сўнг Клок баҳсни давом эттира олмаслигини маълум қилди.