Сауль Альварес ва Дэниэл Жейкобс Нью-Йоркда!

Аниқроғи, жаҳон чемпионлари Нью-Йорк шаҳрида белгиланган учта матбуот анжуманининг дастлабкисида иштирок этишди. Бирлаштирувчи чемпионлик жанги 4 май куни бўлиб ўтади.

"Мен ҳамиша жиддий чорловларни кутганман. Жейкобс билан жанг ҳам бундан мустасно эмас. Дэниэлнинг маҳорати, жанг олиб бориш услуби, катта тажрибасидан бохабармиз. Тайёргарлик ҳам шунга монанд тарзда олиб бориляпти. Ҳамма нарса бўлиши мумкин. Нокаут эвазига ғалаба қозонмоқчиман. Шундай бўлса-да, 12 раундлик жангга ҳозирлик кўряпман", - деди Альварес.

"Сен ҳақиқий чемпионсан! Буни бошқа йўналиш чемпиони билан жанг қилишга рози бўлганинг ҳам кўрсатиб турибди. Мен ҳеч нарсага осонлик билан эришмаганман. Ўта мураккаб йўлни босиб ўтдим. 4 май куни мени яна бир синов кутиб турибди. Шу куни энг катта орзуим рўёбга чиқади: мен учта йўналиш чемпиони бўламан", - Жейкобс.