Сенсация давом этади. Фомин "Челленжер" турнири финалида!

"Челленжер" туркумига кирувчи ушбу мусобақада истеъдодли теннисчимиз Сергей Фомин ҳам муваффақиятли иштирок этяпти. Ҳамюртимиз ҳозиргина якунига етган ярим финал учрашувида дунёнинг 261-ракеткаси, АҚШ вакили Эмилио Навани 6/4, 5/7, тай-брекда 7/6(7/5) ҳисобида мағлубиятга учратди. 

Учрашув 2 соату 26 дақиқа давом этган. Нава баҳс давомида 9 та, Фомин эса 5 та эйс зарбани амалга оширди. Америкалик теннисчи иккинчи даврада турнирнинг биринчи ракеткаси, ATP рейтингида 237-поғонадан жой олиб турган россиялик Александр Шевченкони 6/3, 6/4 ҳисобида таслим этган эди. 

Таққослаш учун, Сергей Фомин ATP рейтингида 838-поғонадан жой олган. Ҳамюртимиз илк даврада рейтингда ўзидан 460 поғона юқорида бораётган россиялик Алибек Качмазовни 6/1 7/6, нимчорак финалда яна бир рейтинги юқори теннисчи, германиялик Себастьян Фанзеловни 6/3, 6/3, чорак финал учрашувида эса турнирнинг 4-ракеткаси, дунё рейтингида 285-поғонадан жой олиб турган япониялик Каичи Учидани 5/7, 6/3, 6/4 ҳисобида доғда қолдирганди. 

Эслатиб ўтамиз, Фомин мағлуб этган Фанзелов Денис Истоминни мусобақадан чиқариб юборган эди.