Сервер Жепаров Эронда эътироф этилди

Мамлакатнинг "Энг яхши футболчиси" деб 30 ёшли Воҳид Амири топилди. "Персеполис" клуби собиқ футболчиси дарҳақиқат якунига етган мавсумни юқори нотада ўтказди. У ҳам клуб, ҳам терма жамоа миқёсида ўзини кўрсата олди. Амири форслар таркибида ЖЧ-2018нинг учала ўйинида ҳам иштирок этди. Яқинда ушбу футболчи Туркиянинг "Трабзхонспор" клубига кўчиб ўтди.

"Энг яхши клуб" сифатида амалдаги чемпион "Персеполис" эътироф этилди. Бу жамоа чемпионат тугашига уч ҳафта қолганида чемпионликни расмийлаштирди. Эрон Про лигасида 19та гол урган Али Алипур "Энг яхши тўпурар" совринини қабул қилиб олди. "Энг яхши ҳимоячи" соврини "Персеполис" сардори Жалол Ҳуссайнига насиб этган бўлса, ушбу клуб посбони Алиризо Бейранванд "Энг яхши дарвозабон" деб топилди.

Шунингдек, Умид Иброҳими "Энг яхши ярим ҳимоячи", ҳамюртимиз Сервер Жепаров эса "Энг яхши ассистент" дея эътироф этилди. Маълумки, Жепаров якунига етган мавсумни Теҳроннинг "Истиқлол" клубида ўтказди. "Пайкан" ҳимоячиси Меҳди Шири "Фейр плей" совринини қабул қилиб олди. Бижан Ҳайдари эса йилнинг "Энг яхши ҳаками" деб топилди. Ва ниҳоят "Энг яхши мураббий" соврини "Персеполис" устози Бранко Иванковичга насиб этди.