Шаҳрам Аҳадов билан янги вазндаги иштирок, энг қийин баҳс, “Ўргимчак одам” ҳақида суҳбат

У -73 кг вазн тоифасида дебют мусобақасида иштирок этишига қарамасдан Ҳикматиллоҳ Тўраев, Муроджон Йўлдошев каби кучли спортчиларни мағлуб этишни уддалади. 

– Янги вазндаги илк иштирокингиздан кўнглингиз тўлдими?

– Албатта, тўлди. Аввал 10 кгдан ортиқ вазн ташлаб курашар эдим. Энди бунчалик қийналиб саломатлигимга зарар етказмасдан 73 кг тоифасида иштирок этмоқдаман. Мамлакат чемпионлиги олдимга қўйган мақсадларим йўлида дастлабки қадам бўлди. Янги йилда катта мусобақалар кутиб турибди. Бунга яраша олдинда улкан режаларим бор. Қолаверса, жароҳатим сабаб 1 йилдан ортиқ кураша олмаган эдим. Бу вақтда мен янада кучли бўлиб қайтдим.

– Чемпионатдаги энг қийин баҳс қайси босқичда бўлди?

– Жуда қийналганим ярим финалдаги Ўрол Содиқов билан ўтган беллашув бўлди. Боиси чорак финалда Ҳикматиллоҳ Тўраевни қўшимча дақиқадаги қийин баҳсда мағлуб этганимдан сўнг қисқа вақт ичида яна татамига чиқишга тўғри келди ва бу баҳс тақдири ҳам қўшимча дақиқада ҳал бўлди. Орада дам олишга деярли имкон бўлмагани учун ярим финалда қийналдим.

– Татамига чиқиб келишингизни “Ўргимчак одам” фильмидаги бош қаҳрамонга қиёсловчи суратлар чиқиб кетди. Бунга қандай фикрдасиз?

– Бу сурат менга ҳам ёқди. Исташса, шундай чақиришсин. Бундан хафа бўлмайман.

– Янги вазндаги чет эллик рақибларингиз қанчалик ўрганилган?

– Улар билан -66 кгда иштирок этганимда йиғинлар пайти курашиб кўрар эдим. Ким қандай усулларни қўллашини биламан. Қолаверса, энди мураббийларим билан уларнинг баҳсларини видеоларда таҳлил қилиб, назарий йўналишда ҳам ишлаймиз. Ғалабани Аллоҳ беради. Биз мияни жойига қўйиб, рақиб ким бўлишидан қатъий назар баҳсга ҳам руҳан, ҳам жисмонан тайёрланишимиз керак.

– Сиз асосан тик ҳолатдаги курашда яхши ҳаракат қиласиз. Партер бўйича ким билан ишлаяпсиз ёки бу йўналишни ёқтирмайсизми?

– Тўғри, тик ҳолатда курашишни яхши кўраман. Бироқ имкони бўлса, партерда ҳам ишлаб тураман. Тик ҳолатда курашишда рақибни чиройли усулларга тушириш, ундаги шиддат менга кўпроқ ёқади.