Шоҳжаҳон Эргашев Тошкент халқаро аэропортида тантанали кутиб олинди + ФОТО

Бугун ҳамюртимиз Америка Қўшма Штатларидан Москва орқали юртимизга қайтиб келди. Шоҳжаҳон Ислом Каримов номидаги Тошкент халқаро аэропортида тантанали тарзда кутиб олинди. Ушбу тадбирда Ўзбекистон Миллий олимпия қўмитаси, мамлакат профессионал бокс федерацияси мутасаддилари, спортчининг яқинлари ва оммавий ахборот воситалари ходимлари иштирок этишди.

“Ватанимга ёруғ юз ва фаолиятимдаги илк камар билан қайтиб келганимдан бениҳоя мамнунман. Ушбу ғалаба барчамиз, мен учун дуода бўлган бутун ўзбек халқининг ғалабаси деб биламан. «WBA International» камарини эса биз ёшлар учун беқиёс шароитлар яратиб бераётган юрт отаси – муҳтарам Президентимизга бағишлайман. Насиб қилса бундан кейинги жангларимда навбатдаги ғалабаларим билан Ўзбекистонимиз довруғуни дунёга танитишда ўз ҳиссамни қўшаман”, – деди Шоҳжахон Эргашев.

Маълумот учун, Шоҳжаҳон профессионал рингдаги фаолияти давомида 12 та жанг ўтказган ва уларнинг барчасида ғалаба қозонган. 11 та жангда у рақибларини нокаут эвазига мағлуб этган. Ўзбекистон Миллий олимпия қўмитаси боксчимизни ушбу муваффақият билан муборакбод этади ва энди жаҳон чемпионига аталган камарни қўлга киритишини тилаб қолади.