Шов-шув кўтарган қозоқ теннисчи Галледа иккинчи бор чемпион бўлди

Terra Wortmann Open турнирининг ҳал қилувчи финал учрашувида қозоғистонлик Александр Бублик дунёнинг 11-ракеткаси, россиялик Даниил Медведевга қарши кортга чиқди. ATP рейтингида 45-поғонани эгаллаб турган Бублик аввалига дунёнинг биринчи ракеткаси, кейин эса қолган номдор рақибларини мағлуб этиб, якунда чемпион бўлди. 

Саксон бир дақиқа давом этган финал баҳсида Бублик Медведевни 6/3, 7/6(4) ҳисобида мағлубиятга учратди. Қозоғистонлик теннисчи еттинчи учрашувга келиб илк бор Даниилдан устун келди. Бундан аввалги ўзаро учрашувларнинг олтитасида Медведев ғалаба қозонганди - 1:6. 

Қизиғи, иккала теннисчи ҳам финалда 11 тадан эйс зарбасини ижро этишган. Бублик фаолиятидаги бешинчи ATP совринини қўлга киритди. У Галле турнирида иккинчи маротаба чемпион бўлди. Terra Wortmann Open турниридаги муваффақиятли иштирок Бубликка 500 рейтинг очкоси ва 471,755 евро мукофот пули келтирди. Медеведев эса қаторасига бешинчи финалини ҳам бой берди.