Синдаров ғалаба қозонган "Номзодлар турнири" 1-турида қандай натижалар қайд этилди? Бугун Жавоҳирни кимга қарши баҳс кутмоқда?

Хабар берганимиздек, мусобақада амалдаги Жаҳон Кубоги ғолиби ҳамюртимиз Жавоҳир Синдаров муваффақиятли старт олди. Гроссмейстеримиз илк турда россиялик Андрей Есипенкога қарши баҳс олиб борди ва нафақат мағлубиятли вазиятдан чиқиб кетди, балки ғалаба қозонди ҳам.  

Қизиғи шундаки, Есипенко "Номзодлар турнир"га саралаш баҳсида яна бир шахматчимиз Нодирбек Якубброевни мағлубиятга учратиб, сўнгги учинчи йўлланма соҳибига айланганди. Кечаги ғалаба орқали Жавоҳир Андрей Есипенкодан Нодирбек учун реванш олди. 

Биринчи турнинг яна иккита партиясида бир томоннинг ғалабаси қайд этилди. Америкаликларнинг ўзаро баҳсида Фабиано Каруана Ҳикару Накамурани мағлуб этди. Ҳиндистонлик Рамешбабу Праггнанандҳа нидерландиялик Аниш Гирини енгди. Германиялик Маттиас Блубаум ва хитойлик Вей Йи партиясида томонлар дурангга имзо чекишди. 

Биринчи турдан сўнг турнир жадвалида Фабаино Каруана қўшимча кўрсаткичларга кўра пешқадам бўлиб турибди. Жавоҳир Синдаров иккинчи ўринни банд этган бўлса, Рамешбабу Праггнанандҳа кучли учликка якун ясаган. 

Бугун Жавоҳир Синдаров 2-турда оқ доналарда Маттиас Блубаумга қарши баҳс олиб боради. Иккинчи тур партиялари ҳам бизнинг вақт билан соат 17:30да бошланади. Жавоҳир Жаҳон тожи учун ўйнаш имкониятини берадиган турнирда иштирок этаётган 1-ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.