Сноубордчимиз Бутунжаҳон қишки универсиадаси финалида чиқиш қилди

Кеча, 5 март куни “Сопка” деб номланган спорт мажмуасида сноуборднинг параллел слалом-гигант йўналишида баҳслар ўтказилди. Мусобақа қайдномасида 18 давлатдан келган 26 эркак, 19 аёл спортчи рўйхатдан ўтган эди, деб хабар бермоқда Жисмоний тарбия ва спорт вазирлиги матбуот хизмати.

Ушбу гуруҳда мамлакатимиз шарафини Екатерина Лябина ҳамда Жасур Маҳмудов ҳимоя қилишди.

Гарчи, Жасур мазкур йўналишдаги иштирокини квалификация босқичидаёқ якунлаган бўлса-да, Екатерина саралашдан муваффақиятли ўтиб, иккинчи босқичда ҳам ўз имкониятини синовдан ўтказди. Медаллар учун кураш қизғин кечган финал босқичида спортчимиз россиялик Наталья Соболевага имкониятни бой бериб қўйди. Якунда айнан Наталья мусобақанинг бронза медалини қўлга киритди.

Бугун сноубордчиларимиз параллел слалом йўналишида ўз маҳоратларини намойиш этишади.