Солт-Лейк-Ситидаги UFC 332 турнири иккита тарихий рекордни янгилади

Ўтказилган шоунинг ўн тўртта жангида ўн битта нокаут қайд этилди, уларнинг тўққизтаси биринчи раунддаёқ якунланди. Шу тариқа, бир турнир давомида UFC`нинг иккита рекорди бир вақтнинг ўзида янгиланди.

Умумий нокаутлар сони бўйича аввалги рекорд тўққизтага тенг бўлиб, у 2025 йил 6 сентябрь куни Парижда бўлиб ўтган UFC Fight Night 258 турнирида ўрнатилганди. Ўша турнирнинг марказий жанги Нассурдин Имавов ва Кайо Борральо ўртасидаги ўрта вазн тоифасидаги баҳс эди. Биринчи раунддаги нокаутлар сони бўйича рекорд эса еттитага тенг бўлиб, у 2026 йил 11 июлда бўлиб ўтган UFC 329 турнирига тегишли эди. Ўша куни биринчи раундда техник нокаут билан мағлуб бўлганлардан бири турнирнинг асосий юлдузи Конор Макгрегор бўлганди; у Макс Холлоуэйга қарши жангнинг дастлабки сонияларидаёқ тиззасидан жароҳат олиб, жангни давом эттира олмаганди.

Икки кун аввал энг катта сенсация муаллифи россиялик ўрта вазнли жангчи Роман Копилов бўлди. У камерунлик Атеба Готье билан жангда уч баробар аутсайдер ҳисобланганига қарамай, биринчи раунддаёқ техник нокаут эвазига ғалаба қозонди. Рекордларнинг ўрнатилишига, гарчи ўзи учун салбий натижа билан бўлса-да, россиялик ўрта вазнли жангчи Андрей Пуляев ҳам ҳисса қўшди: у биринчи раундда арубалик Демиан Пинасга нокаут билан имкониятни бой берди.