Спортчилар томонидан Сардоба фожеасида жабр чеккан оилаларга инсонпарварлик ёрдами жўнатилди

Бир неча кун олдин Сирдарё вилоятидаги Сардоба сув омборида юз берган фалокат ҳам жафокаш халқимизни бир мақсад йўлида бирлаштирди. Бу фожеа Ўзбекистон Республикаси Жисмоний тарбия ва спорт вазирлиги ва тизимдаги барча ташкилотлар раҳбар ва ходимларини бефарқ қолдиргани ёʻқ.

Шу муносабат билан, 2 май куни Жисмоний тарбия ва спорт вазирлиги тизимидаги ишчи-ходимлар, спортчилар ва тренерлар Сардоба фожеасида жабр кўрган оилаларга ёрдам аксиясини бошлашди.

Улар томонидан тўпланган буюмлар, озиқ-овқат маҳсулотлари, иссиқ кийим-кечаклар, гигийеник воситалар, кир ювиш машиналари, спорт кийимлари ва жиҳозларидан иборат “Саҳоват карвони” кечанинг ўзида Сирдарё вилоятига етказиб берилди.

Жисмоний тарбия ва спорт вазирлиги томонидан юборилган ҳомийлик кўмаги Гулистон олимпия захиралари мактаб-интернати ҳамда Сирдарё вилояти болалар-ўсмирлар футбол академияси (Футбол маҳорати мактаби) ётоқхоналарига вақтинчалик эвакуация қилинган юртдошларимизга етказиб берилди.

Шунингдек, бу ерга жойлаштирилган фожеадан жабр чеккан юртдошларимизнинг бўш вақтларини мазмунли ташкил этиш ҳамда уларни руҳий қўллаб-қувватлаш мақсадида стол тенниси, шахмат-шашка спорт турлари бўйича бир қатор мусобақалар ҳам ташкил этилмоқда.

Бугун, 3 май куни ҳам Жисмоний тарбия ва спорт вазирлигининг “Саҳоват” аксияси доирасида Тошкент шаҳрида йиғилган рўзғор буюмлари, иссиқ кийим-кечаклар, озиқ-овқат маҳсулотлари, мактаб ўқувчилари учун бадиий китоблар ҳам ўқув қуроллари ва бошқа турдаги маҳсулотлардан ташкил топган иккинчи “Саҳоват карвони” Сирдарё вилоятига жўнатилди.