Сузувчиларимиз РИОЗМИда шуғулланишмоқда

Вакилларимизни апрель ойида Токио Олимпиадасига йўлланма берувчи мусобақа кутиб турибди. Шу боис ҳам терма жамоамиз аъзолари ушбу лицензион турнирларга жиддий ҳозирлик кўришмоқда.

Республика ихтисослаштирилган Олимпия захиралари мактаб интернати ҳавзасида сузиш ва пара-сузиш бўйича терма жамоамиз вакилларининг қўшма йиғини давом этмоқда. Айни пайтда бутун дунё бўйича бир қатор мусобақалар коронавирус сабаб бекор қилиняпти. Шу боис ҳар икки жамоамиз ўзаро тажриба алмашган ҳолда бўлажак баҳсларга ҳозирлик кўришни маъқул кўрди.

“Бўлажак мусобақаларга яхши тайёргарлик олиб бормоқдамиз. Яратиб берилаётган барча шароитлар учун ҳукуматимизга ташаккур айтиб ўтмоқчиман. Биз эса бунга жавобан катта меҳнат қилмоқдамиз. Мен 50 ва 100 метр масофаларга сузиш бўйича Токио-2020 Олимпия ўйинларига йўлланма олишни ният қилганман. Апрель ойида ўтадиган Жаҳон кубогида Олимпиада нормативини бажаришни мақсад қилганман”, – деди терма жамоамиз вакили Наталья Критинина.

Атлетларимизнинг машғулоти режа асосида олиб борилмоқда. 27 даража илиқликдаги сув ҳароратида кунига 2 маҳал ўтказилаётган машғулотлар сузувчиларимизнинг маҳоратини янада оширишга хизмат қилиши табиий.