Таэквондо. Терма жамоамизнинг 5 нафар вакили "Уси Катта дубулға" турнири финал босқичига йўл олди

Кун давомида эркаклар -58 кг, -80 кг вазн тоифаларида, аёллар эса -57 ҳамда +67 кг вазн тоифаларида баҳс олиб борди.

Кечаги кун терма жамоамиз учун -80 кг вазн тоифасида омадли ўтди, дейиш мумкин. Унда иштирок этган уч нафар спортчимиздан икки нафари совринли ўринлардан жой олди:

Олтин. Жасурбек Жайсунов (Ўзбекистон)

Кумуш. Максим Хромсов (Халқаро нейтрал спортчи)

Бронза. Шуҳрат Салаев (Ўзбекистон)

Мусобақа доирасида -57 кг вазн тоифасида терма жамоамиз шарафини ҳимоя қилган Чарос Қаюмова ҳамда Мадина Мирабзалова ўз иштирокини нимчорак финалда якунлади. Эркаклар ўртасида -58 кг вазн тоифасидаги вакилларимиз Амирбек Тўраев 1/16 финал жангида ғалаба қозонганига қарамай, нимчорак финалда рақибига имкониятни бой бериб қўйди. Омонжон Отажонов ҳам афсуски, чорак финал йўлида хитойлик рақибига мағлуб бўлди.

Шундай қилиб, турнирнинг финал босқичига йўлланма олган таэквондочиларимиз сони 5 тага етди. Булар: Жасурбек Жайсунов, Шуҳрат Салаев, Никита Рафалович, Озода Собиржонова ҳамда Феруза Содиқова.

Эртага турнирнинг ҳал қилувчи, финал босқичи старт олади.