Тарих саҳифаларига муҳрланаётган 2022 йил ўзбек дзюдоси учун тарихий бўлди

Тарих саҳифаларига муҳрланиб бораётган 2022 йил ўзбек спорти, хусусан дзюдоси учун ҳам омадли келди. Ўзбекистон тарихда илк бор катталар ўртасидаги жаҳон чемпионатига мезбонлик қилди. Ўзбек дзюдоси тарихида илк бор терма жамоамизнинг икки аъзоси жаҳон чемпионига айланди. Давлат Бобонов (-90 кг) ва Музаффарбек Тўрабоев (-100 кг) 35-жаҳон чемпионатининг олтин медалини қўлга киритишди. Мамлакатимиз Президенти Шавкат Мирзиёев шахсан "Ҳумо Арена"га ташриф буюриб, финал беллашувларини кузатиш баробарида шахсан ўзи Давлат Бобоновнинг тақдирлаш маросимида иштирок этди. 

Ўзбекистон ўсмирлар ҳамда ёшлар терма жамоалари мос равишда Босния ва Герцеговиния ва Эквадор давлатларида ўтказилган жаҳон чемпионатларида кучли бешликдан жой олишди. Ўсмирларимиздан Барчиной Қодирова, ёшларимиздан Жаҳонгир Маматраҳимов шарафига Ўзбекистон мадҳияси янгради. 

Диёра Келдиёрова ўзбекистонлик аёл дзюдочилар орасида биринчи бўлиб ўз вазн тоифаси рейтинги пешқадамига айланди. Давлат Бобонов қаторасига иккинчи йил ҳам -90 кг вазн тоифаси рейтингини 1-ўринда якунлади. Тарихда илк бор 7 нафар дзюдочимиз жаҳон рейтингида карвонбошилик қилишди.

Жаҳон чемпиони Музаффарбек Тўрабоев Ўзбекистоннинг 2022 йилдаги "Энг яхши спортчиси" деб топилди. Мамлакатимизнинг 14 ҳудудида фойдаланишга топширилган ихтисослаштирилган дзюдо мактаблари болалар билан гавжум.  

Умид қиламизки, 2023 йил ҳам ўзбек дзюдоси учун омадли келади. Дзюдочиларимиз Португалиядаги мусобақа билан мавсумдаги иштирокларини бошлашади. Март ойида Тошкентда "Катта Дубулға" турнири ўтказилади. Йилнинг энг асосий мусобақаси - Осиё ўйинларида спортчиларимиз, хусусан дзюдочиларимиздан тарихий натижалар кутиб қоламиз. 

Ўзбекистон дзюдо федерацияси матбуот хизмати