11 фев 12:58
Янгиликлар

Дзюдо

Тартиб-интизом масаласида яна бир йиғилиш ўтказилди

Ўзбекистон дзюдо федерациясида навбатдаги йиғилиш бўлиб ўтди ва унда аёллар терма жамоасининг янги бош мураббийи Жамшид Худойберганов дзюдочилар билан тартиб-интизом масаласида суҳбатлашди.

Йиғилишда Ўзбекистон дзюдо федерацияси раиси ўринбосари Шокир Мўминов, аёллар терма жамоаси мураббийлари, дзюдочиларимиз иштирок этишди. Ушбу йиғилишни ўтказишдан кўзланган асосий мақсад - дзюдочиларни ички тартиб-интизом билан яна бир бор таништиришдан иборат эди.

Зеро, натижанинг калити, пойдевори интизомда. Тартиб-интизом таъминланмаган жамоа ёки шунга амал қилмайдиган спортчи кўзланган натижага эриша олмайди.

Терма жамоанинг барча аъзолари ҳамда номзод дзюдочилари машғулот залига телефонларни олиб кирмасликлари, эрталабки бадантарбия машғулотида юз фоиз иштирок таъминланиши, соат 22:00да ҳамма ўз хонасида бўлиши ва федерация ҳудудидан ташқарига чиқмаслиги уқтирилди. Мавжуд қоидаларга амал қилмаган дзюдочиларга қатъий жазо қўлланилади.