14 ноя 19:08
Янгиликлар
Тасдиқланди: Лазизбек Мулложонов допинг сабаб 3 йилга дисквалификация қилинди
Шу йилнинг 11 июнь куни мусобақадан ташқари ўтказилган допинг назорати чоғида ўзбекистонлик боксчи Лазизбек Мулложоновдан олинган намунада метастерон моддаси - анаболик-андрогеник стероид аниқланганди.
Ўша пайтда унга дастлаб, вақтинчалик четлатиш жазоси қўлланилганди.
Халқаро тест агентлигининг (ITA) маълум қилишича, Мулложонов ўзига нисбатан 3 йиллик дисквалификация жазоси қўлланилишига рози бўлган. Қайд этилишича, Лазизбек антидопинг қоидаларини (ADRV) бузгани бўйича қарорга эътироз билдирмагани орқали 4 йил эмас, балки 3 йилга дисквалификация қилинган. Ҳамюртимизнинг ҳаваскор боксдаги дисквалификация муддати 2025 йил 22 июлдан 2028 йил 21 июлгача амал қилади.
Бу ҳолатда шу нарса ойдинлашяптики, Лос-Анжелес-2028 Олимпиадаси боксчимизнинг "рўйхати"дан ўчирилади. Унинг 2025 йил 11 июндан 22 июлга қадар ҳаваскор боксда қайд этган барча натижалари бекор қилинади.
Қизиғи, Лазизбек Мулложонов бугун Тошкентдаги проф бокс оқшомида рингга кўтарилади.
Фикрлар