Tashkent Open. Ясмина 68 дақиқалик учрашув ўтказди

Соврин жамғармаси 250 000 АҚШ долларини ташкил қилувчи ушбу мусобақага Республика олимпия захиралари теннис мактаби кортлари мезбонлик қилмоқда. Турнирда йигирмадан ортиқ давлатдан кўзга кўринган теннис маликалари иштирок этяпти. 

Асосий тўр баҳсларида ҳамюртларимиздан Сабина Шарипова (126) ва Нигина Абдураимова (300) юртимиз спорт шарафини ҳимоя қилади. Тажрибали Оқгул Омонмуродова ва истеъдодли Ясмина Каримжонова эса бугун старт оладиган саралаш тунирида ўз имкониятларини синаб кўришади. 

Ҳозиргина дунё рейтингида 1236-поғонадан жой олган Ясмина саралашнинг ярим финалида жаҳоннинг 133-ракеткаси россиялик Анастасия Потаповага қарши кортга чиқди. Бир соату 8 дақиқа давом этган баҳсда Потапова 6:3, 6:1 ҳисобида зафар қучди. 

Потапова саралашнинг биринчи ракеткаси, Каримжонова эса имтиёзли йўлланма асосида саралаш баҳсларига қўйилган эди. Мағлубиятга учраган ҳамюртимиз 1 рейтинг очкоси ва 750 долларга эга бўлди. 

Бироздан сўнг Оқгул Омонмуродова саралашнинг ярим финалида голландиялик Бибиана Схофсга қарши кортга чиқади. Оқгул WTA рейтингида 628, Бибиана эса 184-ўринни эгаллаб турибди.