“Тасисат Дарёи” “Олмалиқ”ни чорак финалга олиб чиқди

Таиланд пойтахти Бангкок шаҳрида футзал бўйича клублар ўртасидаги Осиё чемпионатининг гуруҳ босқич баҳслари давом этмоқда. Ҳозиргина якунига етган гуруҳимиздаги сўнгги учрашувда Эрон чемпиони “Тасисат Дарёи” клуби Ливан чемпиони “Ал Маядин” жамоасини йирик 6:2 ҳисобида мағлуб этди.

Ушбу ғалаба “Олмалиқ” жамоаси учун айни муддао бўлди. Боиси, кеча “Олмалиқ” ва “Ал Маядин” клубларининг ўзаро ўйинида 2:2 ҳисоби қайд этилганди.

Эслатиб ўтамиз, Александр Петров шогирдлари илк турда “Тасисат”га 3:4 ҳисобида ютқазишганди. Ливан чемпиони 4та тўп фарқи билан мағлуб бўлди. Тўплар нисбатига кўра “Олмалиқ” гуруҳда 2-ўринни эгаллади ва чорак финалга йўл олди.