Тбилиси Гран приси. Умумжамоа ҳисобида 15-ўринни эгалладик

Уч куни давом этган мусобақада 52 давлат дзюдочилари турнир медаллари ҳамда Токио-2020 Олимпиадасининг муҳим рейтинг очколари учун татамига чиқишди. Улар орасида Ўзбекистон терма жамоасининг 6 нафар аъзоси ҳам бор эди. 

Ҳамюртларимиздан -60 кг вазн тоифасида Шарофиддин Лутфуллаев ҳамда -100 кг вазндаги полвонимиз Муҳаммадкарим Хуррамов бронза медали ҳамда 350 рейтинг очкосини қўлга киритишди. -90 кг вазнли дзюдочимиз Давлат Бобонов эса 5-ўрин ҳамда 250 рейтинг очкосига эга бўлди. 

Умумжамоа ҳисобида терма жамоамиз 15-ўринни эгаллади. Учта олтин, битта кумуш, 3та бронза медалини қўлга киритган Франция терма жамоаси биринчи ўринни эгаллади. Иккита олтин, 2та кумуш, 6та бронза медалига сазовор бўлган Грузия терма жамоаси иккинчи бўлди. Кучли учликка 2та олтин, битта кумуш, 3та бронза медали билан Голландия терма жамоаси якун ясади. 

Тўртинчи ўриндан жой олган Косово терма жамоаси дзюдочилари иккита олтин медал билан уйга қайтишди. Куба, Исроил, Португалия, Россия ва Италия терма жамоалари турнирда биттадан олтин медални қўлга киритишди. Жами 18 давлат спортчиларига камида битта бронза медали насиб қилди.