11 сен 12:00
Янгиликлар
Теннис. "Дэвис кубоги". Буюк Британия - Ўзбекистон. ПРЕВЬЮ
Бугун мана шу тўқнашув ҳақида бир оз маълумот бериб ўтишга қарор қилдим.
Демак, рақибларимиз Буюк Британия таркибидан терма жамоа устунлари бўлмиш Энди Маррей ва Кайл Эдмундлар жой олишмади. Бу биз учун қувонарли ҳол албатта. Аммо уларсиз ҳам рақиб анча кучли таркибга эга.
Буюк Британия таркибидан Кэмерон Норри(70), Жей Кларк(173), Дэниэл Эванс(222), Жейми Маррей(жуфтликда 11-ўрин, яккаликда рейтингга эга эмас), Доминик Инглот(жуфтликда 23, яккаликда рейтингга эга эмас) каби теннисчилар жой олишди. Терма жамоа капитани Леон Смит. Умуман, рақибларда яккаликда учта деярли бир хил табақага эга теннисчилар мавжуд. Жуфтликда хам иккита кучли теннисчига эгалар.
Энди Ўзбекистон терма жамоаси таркиби билан танишинг: Денис Истомин(60), Жўрабек Каримов(434), Санжар Файзиев(516), Ҳумоюн Султонов(536), Фаррух Дўстов(1086). Терма жамоа капитани Петр Лебед.
Кўриб турганингиздек терма жамоалар ўртасида рейтинг бўйича анчагина фарқ бор, лекин умид хам йўқ эмас. Чунки, бундан хам ёмонроқ бўлиши мумкин эди. Энди Марей жароҳати сабаб баҳсларни ўтказиб юборса, Кайл Эдмунд Австралия очиқ чемпионатидан буён хард кортларда ўтказган учрашувларининг 70% ни ютқазган. Шу сабаб терма жамоа сардори уни бу беллашувга чақирмади (чунки уларда бошқа термалардаги каби таниш билиш, фалончини укаси экан деган нарсалар йўқ. Ким яхши тайёргарликка эга бўлса ўша кортга чиқади, ёши ва тажрибасидан қатъий назар).
Энди бевосита Ўзбекистон шарафини яккалик ва жуфтлик баҳсларида ҳимоя қилиши мумкин бўлган теннисчилар ҳақида бир оз таҳмин билдирсак. Яккаликда катта эҳтимол билан Денис Истомин ва Жўрабек Каримовлар икки мартадан кортга чиқишади. Агар ҳаммаси жойида бўлса улар жуфтликда ҳам тандем ҳосил қилишади. Асосий ўйинчиларимиздан кимдир мусобақанинг илк куни 5 сетлик узоқ ўйин ўтказадиган бўлса, жуфтликда уларни катта эҳтимол билан Санжар Файзиев ёки Ҳумоюн Султоновлар алмаштириши мумкин. Албатта буларнинг барчаси шаҳсий фикр. Таркибни эса термамиз сардори Петр Лебедь тузиб чиқади.
Ўзбекистон терма жамоаси тарихда "Девис кубоги" жаҳон босқичига хеч қачон чиқа олмаган. Плей-офф баҳсларида эса юбилей - ўнинчи марта иштирок этади. Бу балки яқиндагина 32 ёшни қаршилаган Денис Истоминнинг жаҳон босқичида ўйнаш учун сўнгги имконияти бўлиши мумкин. Нима бўлганда хам уларни юртимизга ёруғ юз билан қайтиб келишларини тилаб қоламиз! Олға Ўзбекистон!!!
Ҳусниддин Мирзалиев
Фикрлар