Терма жамоамиз Анталиядан Тель-Авивга етиб борди

Дунёнинг 63 давлатидан жами 429 (252 эркак, 177 аёл) дзюдочи иштирок этадиган мусобақада Илиас Илиадис мураббийлигидаги дзюдочиларимиз юртимиз шарафини ҳимоя қилади. Терма жамоамиз икки ҳафта мобайнида Туркиянинг Анталия шаҳрида ўқув-машғулот йиғинини ўтказган эди. Делегациямиз айнан Анталиядан Тель-Авив шаҳрига етиб келди ва мезбонлар томонидан барча иштирокчилар учун ажратилган Hilton меҳмонхонасига жойлашди.   

Ўзбекистон терма жамоаси таркибига назар ташласак, кичик ўзгаришлар кўзимиз тушади. Жаҳон чемпионатининг кумуш медали совриндори Шарофиддин Лутфуллаев, -73 кг вазндаги етакчи дзюдочимиз Ҳикматуллоҳ Тўраев, энг оғир вазнли вакилимиз Бекмурод Олтибоев Тель-Авив турнирида иштирок этмайди. Табиийки, улар Анталия йиғинида ҳам қатнашишмади. Мураббийлар штаби маслаҳатлашган ҳолда бу сафарги турнирда ёшларга имконият беришяпти. Жароҳатидан фориғ бўлиб қайтган Алишер Юсупов, ёшлардан Шохруҳ Бахтиёров, Жалолиддин Бойназаров таркибни тўлдирган.     

Тель-Авив "Катта Дубулға" турнирида қатнашадиган таркиб:

-60 кг: Диёрбек Ўразбоев

-66 кг: Сардор Нуриллаев, Муҳриддин Тиловов 

-73 кг: Жалолиддин Бойназаров 

-81 кг: Шарофиддин Болтабоев

-90 кг: Давлат Бобонов

-100 кг: Муҳаммадкарим Ҳуррамов

+100 кг: Алишер Юсупов, Шохруҳ Бахтиёров

Қизлар

-52 кг: Диёра Келдиёрова

-70 кг: Гулноза Матниязова