Терма жамоамиз медаллар жамғариш бўйича олти поғонага пастлади

Терма жамоамиз дзюдочиларимиз Диёрбек Ўрозбоев ва Ришод Собиров қўлга киритган иккита бронза медали билан умумжамоа ҳисобида 207 иштирокчи давлат орасида 39-ўринни эгаллаб турибди. Бир кун аввал биз 33-поғонадан жой олгандик.

Олимпиаданинг тўртинчи кунги баҳсларидан сўнг АҚШ терма жамоаси медаллар жамғариш бўйича пешқадамликни ўз қўлида сақлаб турибди. Океан орти жамоаси жами 26та медални қўлга киритиб улгурди. Шулардан 9таси олтин, 8таси кумуш, 9таси бронза медалларидир.

Иккинчи ўриндаги Хитой терма жамоасида 8та олтин медал бор. Кумуш медаллар 3тани, бронза эса 6тани ташкил қилмоқда. Тўртта олтин ва биттадан кумуш ҳамда бронза медалига эга Венгрия терма жамоаси учинчи ўринга кўтарилиб олди. Тўртинчи поғонадаги Австралияда 4та олтин ва 5та бронза медали бор.

Шу кунгача 24та давлат терма жамоалари камида бир нафар Олимпиада чемпионига эга бўлиб улгурди. Ўттиз саккизта терма жамоа эса ҳисобида камида биттадан кумуш медал бор. Қирқ еттита мамлакат жамоаси эса камида биттадан бронза медалига эга.