Терма жамоамиз Сеул орқали дзюдо ватанига жўнаб кетди

Терма жамоамиз делегацияси Сеул орқали Осака “Катта Дубулға” турнирига етиб боришади. Айни шу сонияларда дзюдочиларимиз Жанубий Корея пойтахтида бўлиб туришибди.

22-24 ноябрь кунлари ўтказиладиган Осака турнирида дунёнинг 5 та қитъаси, 94 давлатидан жами 534 (307 эркак, 227 аёл) нафар дзюдочи мусобақа медаллари ҳамда Токио-2020 Олимпиадасининг муҳим рейтинг очколари учун татамига чиқишади. 

Осака татамиларида юртимиз шарафини 7 нафар дзюдочимиз ҳимоя қилади. Терма жамоа мураббийлари етакчи дзюдочиларимизнинг айримларига дам беришни лозим топишган. Осака турнири ғолиблари ўз ҳисобларига қимматли 1000 рейтинг очкосини ёзиб қўйишади. Кумуш медаль соҳиблари 700, бронза медаль эгалари эса 500 рейтинг очкосига эга бўлишади. Бешинчи ўрин учун 360, еттинчи ўринга эса 260 рейтинг очкоси берилади.   

Терма жамоа таркиби:

-60 кг: Кемран Нуруллаев

-81 кг: Камолиддин Расулов

-90 кг: Давлат Бобонов

-100 кг: Муҳаммадкарим Хуррамов

+100 кг: Алишер Юсупов

Қизлар:

-52 кг: Диёра Келдиёрова

-78 кг: Нодира Йўлдошева