"Тез орада кўришамиз": Гэрри Махачев билан жангга ишора қилди

Ирландиялик Йен Мачадо Гэрри россиялик чемпионнинг навбатдаги рақиби бўлади. Мачадонинг ўзи ҳам бу маълумотни тасдиқлагандек бўлди. У ижтимоий тармоқдаги саҳифасида қўнғироқ қилаётган телефон томон югуриб бораётган видеони эълон қилди ва унга маъноли изоҳ қолдирди.

"Тез орада кўришамиз!", - деб ёзди Гэрри.

Аввалроқ спорт шарҳловчилари Альваро Колменеро ва Ариэль Хельвани Ислам Махачев ва Йен Мачадо Гэрри ўртасидаги чемпионлик жанги 15 август куни Филадельфияда бўлиб ўтадиган UFC 330 турнирининг асосий воқеаси бўлиши мумкинлигини айтишганди. Исламнинг жамоасида эса чемпион жангга тайёргарликни бошлаганини тасдиқлашган эди.

Ислам Махачев ўтган йилнинг ноябрь ойида австралиялик Жек Делла Маддаленани ҳакамларнинг якдил қарори билан мағлуб этиб, дивизионнинг янги чемпионига айланганди. Йен Мачадо Гэрри эса ўша ойда дивизионнинг собиқ чемпиони Белал Муҳаммадни очколар ҳисобига кўра мағлуб этди. Ҳозирда у UFC ярим ўрта вазн тоифаси рейтингида иккинчи ўринни эгаллаб турибди.