Тўлқин Қиличев Ўзбекистон ва Қозоғистоннинг боксдаги муносабатлари ҳақида гапирди

"Биз Қозоғистон жамоаси билан жуда ҳам яқинмиз. Бир-биримизга ғайғурамиз, ҳаётий масалалар бўлса бир-биримиздан сўраймиз, телефон орқали мулоқот қиламиз. Мен қозоғистонлик йигитлар билан бирга катта бўлганман. Ердос Жанберганов - жаҳон чемпиони. Биз бир хонада яшаб, бирга ўқиб, бирга нон-туз еб катта бўлган боллармиз. Бахит Сарсекбаев, Ерник Жаниберганов, Дмитрий Средов бор, яна кўпчиликни айтсам бўлади. Улар билан Чирчиқда бирга катта бўлганмиз. Қозоғистонлик барча мураббийлар билан ҳам жуда яқинмиз. Мирзагали Aйтжановни айтишим мумкин. Улар билан борди-келдимиз бор. Шунақа қадрдон бўлиб кетганмиз. Марат Жакиев, бош мураббий Қайрат, умуман ҳаммаси билан яхшимиз. 

Бизнинг йигитлар Қозоғистон номидан жанг қилса ёки Қозоғистон фарзанди бизни номимиздан чиқса, биз бундан фахрланамиз, Қозоғистондан келган болани биз чемпион қилдик деб. Биз битта элмиз. Қозоғистон ва Ўзбекистон харитага қараганда бор. Лекин тарихни биласиз, ҳеч қачон у ёки бу деган нарса бўлмаган. Битта эл бўлганмиз – туркий эли. Бир-биримизни қийин вақтда ҳам қўллаб-қувватлаганмиз. Қозоғистон фарзанди чемпион бўлса ҳам хурсанд бўлганмиз. Элнур ва Мадияр шу ерда туғилиб, бизнинг Чирчиқ Олимпия захирлари коллежига ўқишга кирган. Мадияр энди боксни бошлаган вақтда бизни қўлимизга келган. Элнурни дадаси Нургали ака бокс билан шуғулланган, 7 карра мамлакат чемпиони ҳисобланади. Элнурни ўзи тарбиялаб, ўсмирлик ёшига етганида бизнинг қўлимизга берган. Ҳаммаси қўлимизда катта бўлган боллар. Бизнинг Ватанимиз кўп миллатли мамлакат ҳисобланади. Бизга миллатнинг ҳеч қандай аҳамияти йўқ. Бизда шогирд ва Ўзбекистон байроғи бор. Шуни ўзи катта ютуқ. Биз шу болаларни кучли боксчи қилиб тарбиялай олсак, жуда ҳам хурсанд бўламиз", - деди Тўлқин Қиличев.